Sanaartortitsisut ataqatigiissaarisuisa ilinniarteqqinneqarsimasut sanaartornermi sulinermi avatangiisit pitsanngorsarnissaannut piareerput

Sapaatip-akunnerani 46-mi Nuummi sanaartortitsisut ataqatigiissaarisuinut pikkorissartitsisoqarpoq. Pikkorissarnermi peqataapput siunnersortit, illussanik titartaasartut, entreprenørinut aqutsisut, suliniutinut aqutsisut kiisalu sanaartornermi sanaartugassanillu suliaqarnermi aqutsisut allat. Ulluni tallimani, 9.-13. november 2026, pikkorissarnermi peqataasut sanaartortitsisoq sinnerlugu ataqatigiissaarisutut isumaginninnissamut piginnaasatik annertusivaat.

Pikkorissarnermi sanaartortitsisup ataqatigiissaarisuanut inatsisitigut piumasaqaatit atuuttut immikkut sammineqarlutik, peqataasullu sanaartornermi suliniutinut atatillugu isumannaallisaanermik suliaqarnermik pilersaarusiornissamut, ataqatigiissaarinissamut aqutsinissamullu pisariaqartitaminnik sakkussaqalerput. Siunertaavoq ataqatigiissaarisut sanaartornerup ingerlanera tamakkerlugu isumannaatsumik peqqinnartumillu sulinermi avatangiiseqarnissamut peqataasinnaanissaat.

Ilinniartitsisuulluni Erik Vestergaard peqataasunut sulinermi avatangiisit pillugit ataqatigiissaarinermut tunngasunik pingaarutilinnik, assersuutit atorlugit kiisalu saqqummiinertigut, ilisimasaqarnerulersitsivoq. Sammineqartut ilagaat sulinermi avatangiisinik misissuisarneq, pilersaarusiorneq, isumannaallisaanermik suliassat killilersorneqarnerat ataqatigiissaarneqarnerallu kiisalu Isumannaallisaanermut Peqqissutsimullu Pilersaarummik (Plan for Sikkerhed og Sundhed – PSS) suliaqarneq. Peqataasut aamma misissueqqissaarnernik, suliffimmi isumannaallisaanermut maligassiusumik aaqqissuussinermik kiisalu sanaartorfinni isumannaallisaanermut aaqqissuussaanermik aqutsinermik suliaqarput.

Sapaatip-akunnerata ingerlanerani peqataasut tunniusimalluarlutik piumassuseqarlutillu peqataapput. Pikkorissarnerup naammassinerata kingorna ilinniartitsisoq Erik Vestergaard oqarpoq:

"Taamaalillunga ataqatigiissaarisunngorniartunut holdimut allamut ilinniartitsineq naammassivara. Peqataasut tunniusimalluarput, isumaqarpungalu sapaatip-akunnera pitsaasumik ingerlasimasoq."

Pikkorissarnermi aamma ataqatigiissaarisup sanaartortitsisumut sulinermi avatangiisit pillugit siunnersortitut qanoq atuuffeqarsinnaanera kiisalu sanaartorfinni isumannaallisaanermut peqqissutsimullu tunngatillugu aaqqissuussaasumik suleqatigiinnermik qanoq tapersersuisinnaanera pillugu isumassarsianik pissarsisoqarpoq.

Pikkorissarnerup naammassineratigut peqataasut maanna Kalaallit Nunaanni sanaartornermi sanaartugassanillu suliaqarnermi suliniutinut isumannaatsunut pitsaasumillu ingerlanneqartunut peqataassallutik piareersimanerulerput. Sanaartornermi pitsaasumik angusaqarnissamut sulinermi avatangiisit, pinaveersaartitsineq kiisalu isumannaallisaanermik ataqatigiissaarineq pingaaruteqarluinnarput.

Relaterede nyheder