Inuiaqatigiinni tamangajanni illoqarfinnut nutsertinerit ingerlapput aamma taamaasilluni inuttaasut najugaqarfissaannik katersuutsitsineruvoq. Ineriartorneq taanna pisimasoq ukiuni 100-rujuni nikerartumik ingerlasimavoq. Taanna ineriartorneq inuussutissarsiutinik ineriartortitsinermik ersarissumik tunngaveqarsimavoq aamma teknikkikkut ineriartornermik, taamaasillunik tunisassiornermik ingerlatsisut allisissinnaanngorlugit. Tamanna peqatigitillugu inunnik sulisussanik inuussutissarsiorfiit ilaanni pisariaqartitsineq annikilliartorsimavoq.
Suliffissuaqarneq kiisalu kingusinnerusukkut sullissinermik inuussutissarsiuteqartut immikkut ittumik illoqarfinni ineriartorsimapput aamma nikerartumik annertussusilimmik sulisussanik tigooraasarsimapput, nunap immikkoortuini inuussutissarsiortullu allat pisariaarutitinneqarneranni. Kisianni tamanna isumaqanngilaq, tamarmik nunaannarmiit (nunaqarfinniit) illoqarfinnut nutsersimasut. Suli innuttaasut amerlasuut avinngarusimasuni najugaqarput, taakkunanngaaniillu illoqarfinnut anginerusunut suliartukaasartut utertarlutillu amerliartuaarput.
Taamatut ineriartorneq Kalaallit Nunaannut immikkut illuinnartumik periarfissiivoq – klimarput eqqarsaatigalugu, sineriaq annertooq aamma ajornakusoortumik attaveqaqatigiinnerup ingerlanneqarnera, nunaqarfimmiit illoqarfimmut suliffiit ilinniartitaanerlu eqqarsaatigalugit uteqattaarfiunngitsut.
Sulisitsisut nalilissanngilaat, Kalaallit Nunaata siunissaani inuiaqatigiit qanoq agguataarnissaat ineriartortinneqassanersoq. Tamanna politiikerit suliassaraat. Kisianni kissaatigaarput, najukkani inuussutissarsiutitigut tunngaviit sukumiisumik oqallisiginerisigut ersersinneqarumaartut.