Allamik isumassarsinartigisoqanngilaq ilikkarnarlunilu suliffeqarfimmi tusarlugu, ´qanoq allat iliortarpat´. Aqutsinermi, ingerlatsinermi, ineriartortitsinermi aamma ullutsinni apeqqutini oqallisigineqartunik. Nunatsinni angisoorsuarmi naapikulaarneq ajornakusoortarpoq. Kisianni aamma Sulisitsisuni ilaasortat ilisimasanik avitseqatigiinneq nuannaarutigisarpaat.
Taamaattumik Sulisitsisut qaammatit tamaasa eqqartortarpaat, taasagarput `qaammatip suliffeqarfia´. Suliffeqarfiit isiginiartarpagut, sumiiffinni avatangiisinut immikkut ittumik iliuuseqarsimasut, aamma atuilluartuunermik, naligiisitaanermik, assigiinngisitaartunik sulisullit, ilinniarsimaneq, aallarnisaasuuneq imaluunniit immikkut ittumik angusaqarluarsimaneq.
Isumassarsiaqarsimaguit, suliffeqarfik siunissami sorleq qaamatip suliffeqarfiatut taaneqarsinnaasumik, taava uagutsinnut allanniarina.
Uani qaammammi Polar Seafood oqaloqatigisimavarput.
Polar Seafood-ip sulisuminnut akisussaaffik tigusarpaat – ukiullu suliffeqarfiatut toqqarneqarluni
Peqqissaarneq akisussaaffeqarnerlu Polar Seafood DNA-aavanut ilaavoq. Nalinginnaasumik Miki Brøns-ip taanna eqqartukulanngilaa. Kisianni taamaakkaluartoq taanna annertuumik sulisuminut annertuumik akisussaaffeqarpoq, ukiup siuliani SIK-p Polar Seafood-I ukiup suliffeqarfiatut toqqarpaa. Taamatut toqqarneqarneranut pisooqataalluinnarpoq Corona-p nalaani iliuuseqarneranut: Nalunaaquttap akunnisialimmut imaluunniit ilaqutaasumut nalunaaquttap akunnermusialimmut Coronamik nappaateqalermat, napparsimanerata nalaani tamakkiisumik akissarsiaqartippaat.
SIK-p, sulisartut kattuffiata, Polar Seafod ukiup suliffeqarfiatut toqqarpaa. Tamatumalu tanngassimaarneq nuannaarnerlu suliffeqarfimmi tamani nuannaalersitsivoq.
“Taanna annertuumik nersualaarinninneruvoq, aamma taannaavoq tanngassimaarutigisarujussuarput”, taamatut oqaluttuarpoq Polar Seafood-imi pisortap tullia Miki Brøns.
Oqalukkaangami, ersarittarpoq, sulisut pitsaasunik atugassaqartinneqarnissaat eqqarsaatigisaraa, aamma suliffeqarfimmut taanna tunngaviliisuulluinnarpoq. Tassami taamaappoq aamma taamaattuaannarnikuuvoq. Sulisunik isumaginninneq pingaaruteqarpoq, aamma Miki Brøns-ip suliffeqarfiup ajunnginnerpaamik suliassaatut isigaa akisussaassuseqarfnermik sulisunut takutitsinissaq. Aamma ajornakusooraangat.
“Suliffeqarfittut akisussaassuseqarusuppugut, aamma isumaqarpugut taamatut illuta. Naatsorsuutigineqarsinnaavugut, inuuneq ajornartorsiorfiugaangat. Taamak amerlatigisunik sulisoqaraanni, uagutsitut, taava assigiinngitsorpassuarnik unammilligassaqartarpugut. Sulisugut tapersersorniarlugit ilungersortarpugut – aamma pisariaqanngikkaluaraangalluunniit, inatsimmi oqarpoq, taamaasiussasugut. Takutitsinermut ilaavoq, peqqissaartuunermik takutitsineq,” Miki Brøns oqarpoq.
SIK-p Polar Seafood-imik akissarsisitsimmat, suliffeqarfiup Corona-p nalaani iliuuseqarsimanera annermik ersarissarpaa. Taamanikkut imaappoq, sulisoq akunnermusiali imaluunnit ilaqutaasoq akunnermusialik Coronamik napparsimalerpat, taava tamakkiisumik napparsimanermi nalaani akissarsiaqartinneqarpoq.
”Uagut tunisassiorfitsinni akunnermusiallit amerlasoorujussuupput. Soorunami ikiorpagut aamma tamakkiisumik akissarsiaqartippagut, namminneq imaluunniit ilaqutaasut Coronaraangata, aamma avinngarusimatinneqaraangata sulisinnaanatillu. Tamanna inatsisitigut piumasaqaataanngilaq, kisianni uagutsinnut qularutissaanngilaq – aamma akunnermusiallit taarsiissuteqarfigineqartarput.”
Pitsaasunik inuttaqarnissap pingaarutaa
Polar Seafood 1984-imi pilersinneqarpoq. Sulisut arlallit suliffeqarfik aallartimmalli atorfeqarput, aamma Mikip peroriartornermini takusimavaa, qanoq sulisugissaarneq isumaqartoq.
”Ataatama suliffeqarfimmik pilersitseqataavoq, aamma sulinerani ilagisarsimavara, nukappiaraagallaramali. Pissanganartuaannarsimavoq aamma takusinnaavara, ataata silatuujusoq. Inuit peqqissaaruttarpai, taamaasillutillu tatiginassuseqalersitsisarluni, isumaqarporlu, inuttanik pitsaasunik avatangerneqarsimalluni”.
”Sulisunut pitsaasunik sinaakkuteqartitsinissarput ajunngitsumik anguniartarparput. Taanna pingaarnertut tunngavigaarput,” taamak oqarpoq.
Sulisut pillugit annertuumik suliniuteqartarput
Polar Seafood-ip ilisarnaatigaa, annertuumik piareersimasarnera, sulisutik pitsaasumik sivisuumillu suliffeqarfimmi sulinissaat pillugu. Eqaatsumik suliffissanillu periarfissanut naleqqussaasarput suliffeqarfimmi atorfilittanut peqatigitillugulu, ilinniarsinnaapput – aamma ilinniarnerisa Polar Seafood-ip kisimi iluaqutiginngilaa sulisulli aamma ataasiakkat kisianni aamma Kalaallit inuiaqatigiit tamarmik.
”Pitsaasunik sulisoqanngikkaluarutta, ullumikkut maaniinnavianngikkaluarpugut. Taamaattumik sulisunut suliffissat naleqqussarnissaat sulisinnaanerat pitsanngorsarniarlugu suliassaraarput – soorlu assersuutigalugu utoqqaligaangata, uagutsinniiginnaqqullugit aamma sapinngisamik sivisuumik sulinissaat eqqarsaatigalugu,” oqarpoq Miki Brøns assersuusiorlunilu.
”Sulisugut utoqqaligaangata, taava immaqa suliarisamik assingi suliarisinnaajunnaartarpaat, inuusunnerugallarnermissulli. Taava allamik suliassaannik tunisarpagut. Taanna, isumaqarpugut pissusissamisoortuusoq,” Miki Brøns oqarpoq.
Polar-ip ilinniartitsinerit isumagisarpai
Miki Brøns tanngassimaarluni Polar Seafood-ip ilinniartitsinissamik pilersaarusiaa oqaluttuaraa. Tassani aalisartut inuusuttut ilinniartitaanermut peqataanissaminnut periarfissinneqarput, ullut ilaanni maskinchefinngorniarunik, tunisassiorfimmi pisortanngorniarunik imaluunniit naalaganngorniarunik. Ilinniartitaanerup piareersaneqarneranut ilaavoq, neriuutigineqarluni atorfilik siunissami Polar Seafood-imi ukiuni amerlasuuni atorfeqassasoq.
Kisianni siunissami sulinerannut kisimi ilaanngilaq, Polar Seafood-ip sulisuinik ilinniartitsinerat. Aamma namminersortunut.
”Ilinniartinneqartut kingullit, ilinniartinneqarneranni, privatitut aningaasarsiornertalimmik pikkorissarneqarput. Tassani bankimik isumaqatigiissuteqarsimavugut,” Miki Brøns oqaluttuarpoq nangillunilu:
”Tassani taamaaliortariaqanngikkaluarpugut. Kisianni akisussaaffitsinnut ilaavoq inummik ilivitsuusumik ilinniartitsissalluta. Taava imaassinnaavoq, illumik angallammilluunniit kissaatigisaminnik pisisut peqatigitillugulu aningaasatigut inissisimalluarlutik,” taamak oqarpoq Miki Brøns.
Pilersaarutaavoq, piffissaq ungasinnerusoq isigalugu suliffeqarfiup allaffissornikkut aqunneqarnera assingusumik ilinniartitsinissamik pineqarnissaa, Miki Brøns oqaluttuarpoq. Aalajangiisuulluinnassaaq Polar Seafood-ip suliffeqarfittut suli nangillugu siuariartornissaanut.