Sulisitsisut aammalu Sulisitsisut Sisimiuni immikkoortortaqarfiata suleqatigiillutik Skills 2026-mi, Hjørringimi apriilip 22.-25. 2026 ingerlanneqartussami, kalaallit peqataatinnissaannik tapersersuipput. Siunertaq tassaavoq kalaallit ilinniarsimasuunerisa, sanaluttartutut piginnaasaasa inuussutissarsiornermilu kulturiata takussutissinneqarnissaa kiisalu inuusuttunik inuussutissarsiutinut ilinniartitaanernut soqutiginnilersitsineq.
DM i Skills tassaavoq Danmarkimi inuussutissarsiutinut ilinniartitaanerni inuusuttut akornanni unammisitsineq, peqataasullu 300-t missaanniittut kiisalu tikeraartut tusindilikkaanik peqataaffigineqartartoq. COVID-19 kingorna siullerpaamik KTI Sisimiut Skills-imi pisortatigoortumik peqataaqqissaaq. KTI Hjørringimi inuussutissarsiutinut ilinniarfimmut ikinngutigiittut atuarfeqarpoq, tamannalu kalaallit peqataatinnissaannut tunngavissatsialaavoq.
Kalaallit workshoppertitsissapput – unammisitsineq pinnagu
Kalaallit 2026-mi peqataatinneqarnissaat ilisimasaqarnerup avitseqatigiinneranut ingerlatitseqqinnernullu ukkatarineqassaaq, unammisitsinermut pinnani. Naalakkersuisut Ilinniartitaanermut Naalakkersuisoqarfiata 500.000 kr.-inik tapiissuteqarneratigut inuit 17-it Kalaallit Nunaanniit Hjørringimut angalassapput. Ilaatigut peqataasussat tassaapput:
- KTI Sisimiuni ilinniartut
- Nuummi Servicekolen-imilu ilinniartut
- Royal Arctic Line-meersoq peqataasoq ataaseq
Kalaallit peqataasut inuusuttunut qallunaat sanaluttartunut workshoppertitsissapput. Tassani ilaatigut arktiskimi sanaartorneq, atortussat, periutsit kiisalu sanasut qalipaasullu suliassaqarfiini ingerlatsineq pillugu ilisimasaminnik avitseqatiginnissapput.
Inuussutissarsiornermik aallartitsineq kulturilu Skills-imi ilaassapput
Ilinniartut ilinniartitsisullu saniatigut aamma Sisimiuneersoq inuusuttoq sanasoq namminersorluni suliffeqarfimmik aallartitsisoq peqataassaaq. Taanna Kalaallit Nunaanni inuusuttutut sanasutut suliffeqarfimmillu aallartitsisutut misilittakkaminik avitseqatiginnissaaq.
Aamma inuusuttunik piniartunik marlunnik peqataasoqassaaq, Skills-ip ingerlanerani kalaallit qajaannik sumiiffimmi sanassapput. Taamaalilluni sanalunneq, inuussutissarsiornermik aallartitsineq kulturiilu ataatsimut oqaluttuarineqassapput, kalaallit piginnaasaannik takutitsisumik.
Sulisitsisut tapersersuisut
KTI Sisimiut aamma Uagut ataatsimoorlutik Skills-imi saqqummersitsivimmi peqataassapput. Sulisitsisut Sisimiunilu immikkoortortaqarfiat suliniummut tapersersuisinnaanertik atorlugu peqataatinneqarnissaq pitsaanerpaamik atugassaqartinneqarnissaat kissaatigaat. Sulisitsisut Sisimiuni immikkoortortaqarfiata siulittaasua, Maannguaq Philip Lauritzen, oqarpoq: “Sulisitsisut tapersersuineratigut najukkani piukkunnartunik nutaanik tapersersuinissamut peqataarusuppugut. Uagutsinnut pingaaruteqarpoq sanaluttartutut kinguaariit piukkunnartut ineriartortinnissaat, taamaalilluni Kalaallit Nunaanni inuussutissarsiorneq nukittunerusumik ingerlaqqissinnaassammat.”
Tamatuma saniatigut Skills-imi “Suleqat pisinnaasoq / Kollega med vilje” pillugu suliniut takussutissinneqarnissaa sulissutigineqassaaq, tikeraartullu oqaloqatigineqassapput. Skills inuussutissarsiutinut ilinniartitaanernut, suliffeqarnermut attuumassuteqarnermut kiisalu inunnik isumaginninnermut tunngatillugu pingaarutilimmik takutitsivittut isigineqarpoq.
Sulisitsisut ilinniarsimasunik sulisoqarnerup annertusarneqarnissaanut kiisalu kalaallit sanaluttartut inuussutissarsiortullu ilisimaneqarnerulernissaannut pingaarutilimmik alloriarnertut isigaat – Kalaallit Nunaanni nunanilu allani.