Sulisitsisunit
Oqaatsit issuakkat: Aqqaluk Abelsen, Sulisitsisut Kujataani – Qaqortumi Narsamilu Peqatigiiffianni siulittaasoq
Kujataata tikikkuminarnerulernera, sivikinnerusumik angalasoqartalernissaa aamma Islandimut attaveqaateqarneq tassanngalu nunarsuarmut avammut attaveqaateqalerneq inuussutissarsiornermi ineriartornermut, nuunnermut alliartornissamullu nutaarluinnarnik sinaakkutiissiissaaq.
Sulisitsisuni Immikkoortoqarfik Kujallermi, Qaqortumi Narsamilu suliuttaasup, Aqqaluk Abelsenip isumaa malillugu mittarfik attaveqaasersuut nutaajuinnaanngilaq, siumut isiginnittumik ineriartornissamut sakkussaavoq.
“Qaqortumi mittarfittaaq nunatta immikkoortuani assut pingaaruteqassaaq. Suliffeqarfimmik ingerlatsinissamut pisariinnerulersitsissaaq, aningaasaliisunik orniginarsaassaaq suliffissaqartitsillunilu. Tamatuma saniatigut takornariaqarnermut, inuussutissarsiutigalugu sullissisunut sumiiffinnilu nutaaliortunut pitsanngorsaataassaaq.
Tamatuma saniatigut tikikkuminarsinerata aamma nunat immikkoortui akimorlugit suleqatigiinnissamut pitsanngorsaavigissavai, taavalu nunami suliniutinut tuniniakkanullu suliffeqarfiit peqataanissaannut periarfissagissaarnerussalluni.
“Logistikki tikikkuminartuunerlu pitsanngorsaavigineqarpata suliffeqarfimmik ingerlatsinissaq ajornannginnerulissaaq. Tamanna aalisarnermik, sanaartornermik sullissinermillu suliaqartunut pioreersunut – aammalu suliaqarfiit kujataanut niiuerfissatut isiginnissinnaalernerannik nassataqarpoq.” Aqqaluk Abelsen nassuiaavoq.
Takornariaqarnermut aamma najukkani suliffissanut periarfissat nutaat
Takornariaqarnermik suliaqarfiit mittarfittaartoqarneranik sukkasuumik sunniuteqarnissaanut naatsorsuutigineqarpoq. Kujataanut toqqaannartumik aalaakkaannerusumillu attaveqaateqalernerani nunat tamalaanit nunatsinniillu tikeraartoqarnissaanut orniginarnerulissaaq.
“Kujallermi pinngortitamik kulturikkullu misigisassanik immikkuullarissunik peqarpugut. Maanna suliffeqarfinnut ataavartussanngortitsinissamut najukkamilu suliffeqartitsinissamut periarfissagissaartitsinerulissaagut, Qaqortumiinnaanngitsoq kisianni aamma Narsaq eqqaaniittunilu,” Aqqaluk oqarpoq.
Aqqaluk Abelsenip oqarnera malillugu pingaaruteqarpoq ineriartorneq suliffeqarfiit sulisullu qanimut suleqatigalugit ingerlanneqassasoq, taamaasilluni naleqarnerulersitsineq nunap immikkoortuani atuutsinneruneqarniassammat.
Inuussutissarsiornikkut iluanaarutissat saniatigut Sulisitsisut Immikkoortoqarfimmi Kujataani siulittaasup aamma mittarfik innuttaasunik najugaqaannartitsinissamik kajungerineqarnissaanillu pingaarutilittut isigaa.
“Attaveqaasersuutit pitsaanerutillugit annertunerusumik nuuttarnermut, ilinniarnissamut, peqqissusermut suliffissanullu pitsaanerusumik periarfissiissapput. Tamanna ilaqutariinnut inuusuttunullu siunissaasa kujataaniiginnassaneranik eqqarsaatersuuteqartunut isumaqaqaaq,” Aqqaluk Abelsen naqissusiivoq.
Mittarfittaaq aamma najukkami nunallu immikkoortuani suliniuteqarnerup pitsaasumik piginnaasatigut inerisaanissamut, inuussutissarsiornikkut siuarsaanissamut nutaaliornermullu ingerlaaqatigiiffiussasoq kaammattuutigaa.
Naggasiutigalugu siulittaasup erseqqissaassutigaa mittarfik namminermini allisaanermik pilersitsinavianngitsoq, kisianni periarfissanik akugassanik pilersitsisuusoq.
“Maanna suleqatigiinnissamut tunngalerpoq. Inuussutissarsiortut, kommunit, namminersorlutik oqartussat kiisalu ilinniarfiit akornanni. Aaqqissugaasumik siumullu isiginnittumik suligutta Qaqortumi mittarfik kujataanut tamarmut ineriartornissamut nukittuumik ingerlatsisuusinnaavoq”, Aqqaluk Abelsen oqarpoq.
Sulisitsisut ingerlaatsimut matumunnga tapertaalluarnissamut aammalu Kujallermi suliffeqarfinnut mittarfiup ammarneranut atatillugu periarfissanik ammaassisumut atorluaanissamut tapersiinissamut piareersimapput.
Inaarutaasumik Narsarsuarmi Mittarfimmut qujanarujussuaq ukiorpassuarni sumiiffippassuarnut aammalu Kalaallit Nunaanniit Kalaallillu Nunaannut angalasoqartarsimaneranut. Narsarsuarmi Mittarfik kujataanut assut pingaaruteqarsimavoq maannalu Kalaallit Nunaanni oqaluttuarisaanermi kapitaliulluni annertooq, Narsarsuarmit attaveqaasersuutitigut maanna ingerlariaqqiffittut aallariartorfiulluni.