Qaqortumi mittarfik apriilip 16-ani ammarpat, illoqarfiup orniginartuuneranut inuussutissarsiornermullu nutaamik alloriarnerussaaq, aammali ilusilersuinermik suliniuteqarnerujussuup naammassineqarneranik ersersitsilluni. Arctic Import Greenland Airports qanimut suleqatigalugu nunatsinni mittarfiit nutaat pingasut – Nuummiit maanna Qaqortumut kingusinnerusukkullu Ilulissanut – pequtsersorlugillu ilusilersorsimavai. Sulisitsisut Arctic Import oqaloqatigaat, Issittumi avatangiisini mittarfiit nutaaliaasut qanoq ilusilersorneqartarnissaat pillugu.
Sulisitsisut: Kalaallit Nunaanni mittarfiit ilusilersorneqarnerannut peqataaneq ilissinnut qanoq isumaqarpa?
Jan Rasmussen, Arctic Importimi tuniniaanermut pisortaq:
“Tamanna akisussaaffiuvoq immikkorluinnaq ittoq. Mittarfiit sanaartukkat pisariusuupput, tassani atorluarneqarsinnaaneq, isumannaatsuunissaq, ingerlatsineq kiisalu ilaasut misigisaat ataatsimut ataqatigiissinneqartariaqarlutik. Tamatuma saniatigut Kalaallit Nunaanni mittarfiit immikkut ittunik sinaakkuserneqarsimapput – nunap immikkoortui silallu pissusaat eqqarsaatigalugit. Siunissami nunatsinni angallannermut qitiusumik inissisimaffinnik pilersitseqataanerput tulluusimaarutigaarput, aammalu tamanna maniguulluta suliaraarput.”
Sulisitsisut: Suliniut Nuummi aallartippoq Ilulissanilu Qaqortumilu ingerlaqqilluni. Suna unammillernarnerpaasimava?
Jan Rasmussen:
“Piffissaq eqqorlugu naammassinnissinnaaneq aalajangiisuusimavoq. Mittarfik atorneqaleraangat suliassat pisariunerulertarput. Atortut tamarmik isumannaallisaanikkut misissorneqartariaqarput, aammalu isernissamut immikkut akuersissuteqartoqartariaqartarluni. Taamaattumik pingaarnerpaavoq ammartinnagu sapinngisamik amerlanerpaat naammassineqarnissaat. Tamanna angujumallugu pilersaarusiorluarneq kiisalu sanaartortitsisut, titartaasut sanaartugassanillu suliaqartut qanimut suleqatigineqarnissaat pisariaqarpoq.”
Sulisitsisut: Arctic Importip suut tunniussimavai?
Kasper Lykkegaard Andersen, Arctic Importimi siunnersorti: “Suliffinnut inissat ataatsimiittarfiillu, kiffartuussivinnut toqqorsivinnullu atortulersuutit kiisalu isumannaallisaanermut atortut pilersippavut. Taakku saniatigut tamanut ammasut, loungeqarfiit, meeqqanut pinnguartarfiit, tikittarfissat, napparsimasunut ininut kiisalu meeqqanut ilagisartagaqanngitsunut immikkoortunut atortunik pilersueqataavugut. Tamanna ingerlatsinermut, isumannaallisaanermut kiisalu inuit pisariaqartitaannut tunngassuteqarpoq.”
Sulisitsisut: Misilittakkat suut pingaarnerpaatut tigullugit ingerlateqqissavisiuk?
Jan Rasmussen:
“Nuummi ammaanersiorneq ilinniarfiuvoq pitsaasoq, tassani pisariaqartitat qanoq sukkatigisumik allanngorsinnaanerat takusinnaavarput. Ammaanerup tungaanut sulisut sisamat-tallimat ulloq unnuarlu sulipput, piareersarnissaq anguniarlugu. Ersarippoq inissat ilaanni pisariaqartitsineq annertusiartorsimasoq – assersuutigalugu café mikivallaalersimavoq, taamaattumillu sassaallertarfiit allilerneqarnerannut peqataavugut. Tamanna takutippaa pingaaruteqartoq aallartinnermiilli naleqqussarsinnaaneq eqqarsaatigissallugu.”
Sulisitsisut: Suleqatigiinneq qanoq aaqqissuunneqarsimava?
“Suliniut Greenland Airportsip suliniutinik ingerlatsivianik, Ilulissani Qaqortumilu sanaartornermik suliaqartunik KJ Greenlandimik kiisalu Nuummi TNT Arkitekterinik qanimut suleqateqarluni ingerlanneqarpoq. Jan uagutsinni akisussaanerpaavoq, naammassinissaalu tikillugu suleqatigiippugut.”
Sulisitsisut: Qaqortumi ammaanersiorneq eqqarsaatigalugu suna qilanaaraasiuk?
Jan Rasmussen:
“Qaqortumi mittarfik pingaaruteqarpoq – illoqarfimmut kisimi pinnani, Kujataanut tamarmut. Qilanaaraarput mittarfiup atorneqalernissaa, aammalu pisariaqartitat nutaat takkukkaangata malinnaaffigissallugit. Misilittakkat takutippaat ineriartorneq sukkasuumik ingerlasoq, tamatumunngalu peqataanissarput piareersimaffigaarput.”
Sulisitsisut peqatigiiffiata ilaasortani tamaasa pilluaqquai Qaqortumi mittarfiup apriilip 16-ani 2026-mi ammarnissaanut atatillugu. Tamanna Kalaallit Nunaanni attaveqaatit ineriartortinneqarneranni alloriarneruvoq pingaarutilik, aammalu nunami tamarmi mittarfinnik nutaaliaasunik, atorneqarsinnaasunik siunissamullu piujuartitsisumik pilersitsinissamut pingaaruteqartuuvoq – innuttaasut, tikeraat kiisalu inuussutissarsiortut iluaqutigisinnaasaannik.