Maniitsoq Lodges aappariinnit Mettemit aamma Salimmit ingerlanneqarpoq, qimmiarartik Muffi peqatigalugu naqqaniit Maniitsup qanittuani suliffeqarfiliorsimallutik. Anguniagaq pisariippoq inuppalaarlunilu: nunarsuarmut takutikkusullugu ulluinnarni najugaqarfiat qanoq immikkuullaritsigisoq, nunatsinnit nunarsuarmiillu tikeraanut misigisassarsiortitsinissaq siunissamilu eqqaamasartagassaannik tunisinissaq.
2023-mi suut tamaasa aallartipput, aappariit illuarartik siulleq pisiaraat. Tamatuma pinnginnerani sivisuumik eqqartortarsimavaat qanoq ataatsimoorlutik siunissarerusutaminnik ineriartortitsisinnaanersut. Salik avataani aalisariummi fabrikkimi pisortatut sulisarsimavoq Mettelu Naalakkersuisuni Meeqqanik sullissisunut angalasartuni atorfeqarluni, taamaasillutik ataatsikkut angerlarsimarpiarneq ajorlutik, taavalu marluullutik nuannareqisaminnut angalaarnermut illuaqqiarnermullu piffissaqarpiarneq ajorlutik. Illuaqqamik pisinissamut periarfissaq takkummat isumaqatigiipput tamanna aqqutissaasoq. Kingorna illuaraq nutarsarneqarpoq ineriartortinneqarlunilu massakkut Inussuit Logdetut taagugaasumik.
Maanna Maniitsoq Lodges pingasunik illuaraqarpoq. Inussuit Lodge inunnut 12-inut naammattoq tamakkiisumik nerisaqarfiusoq ukioq naallugu atorneqarsinnaavoq. Tasiusaq Logde illuaraq aasaanerani atortuuvoq inunnut marlunniit sisamanut inissaqartoq. Ikkamiut Lodge oqaluffitoqaallunilu atuarfikuuvoq inunnut 24-inut sinnerlugu inissaqartoq ukiut tamaasa suliffeqarfinnit assigiinngitsunit tammaarsimaarfigineqartarpoq. Tamatuma saniatigut imaatigut angallasineq ingerlanneqarpoq angallat matoqqasoq, Askeladden P79 inunnut arfinilinnut inissaqartoq atorlugu. Ukioq manna aallarnerfigalugu Mettep suliffeqarfia, Mettes Traumeterapi suleqatigalugu illuaqqani ilinniartitsineq, pikkorissaaneq aamma teambuilding (suleqatigiilluarsaaneq) aamma periarfissaalissaaq.
Illuaraqarfiup nalaa immikkuullarilluinnartuuvoq. Ukiuunerani sisorariartunik tikittoqartarpoq, aasaanerani qaqqasioriartunik tikittoqartarpoq, aneerasaartarfiullu saannguani arferit anersaartarlutik. Sumiiffinni arlaqartuni puilasoqarpoq nillarilluinnartumik minguitsumillu imeqarfiusunik, asimilu eqallut, saarulliit, kapisillit pisassaapput uumasoqarfiulluarlunilu. Salik sumiiffiup nalaani peroriartorpoq, ilaqutai tamatuma nalaani illuaqarsimammata sumiiffik nalunngilluarpaa. Tikeraat eqqissisimaarnissamik nipaammiinnissamullu ujartuippata imaluunniit pisoqarfiusumik misigisassarfiusumillu ujartuippata tamaasa misigineqarsinnaapput.
Angusaq aappariinnit immikkut tulluusimaarutaasoq tassaavoq qanittumi Inussuit Lodge marloriarluni ulikkaarluni attartorneqarmat, tikeraanillu nuannersumik utertitsivigineqarsimallutik. Aamma aqqutaani namminneerlutik qanoq sanaartorsimatiginertik, suliaqarsimatiginertik aaqqiisimatiginertillu tulluusimaarutigeqaat. Soorlu 10.000 literimut imermut tanki umiarluk nammineq sanaaq atorlugu illuaqqiaappaat, toqqavimmullu cementikkamut angisuumut kalinneqarluni aappariit namminneq cementiliarisimasaannut sumiiffimmit imeq sioqqallu atorlugit ujaraaqqallu illoqarfiup ujaqqerivianiit atugaralugit. Tanki taamaattoq imaqanngitsoq 950 kg-nik oqimaassuseqarpoq.
Illoqarfimmi mikinerusumi suliffeqarfimmik ingerlatsineq ilungersunartorsiorfigineqarsinnaasarpoq, pisiassat aamma atortussat tikinniartarneri sivisusarput silalu pissutaalluni sanaartornerit sapaatip akunnerini arlariinni uninngasinnaasarput. Ullormi ataatsimi suliat assigiinngissitaartillugit imaannaanngissinnaasaraluartoq, naggataagut suliat iluatsittuaannarput.
Maniitsoq Lodges misigisassanik immikkuullarissunik misigisassarsiorfissatut piumaneqaraluttuinnarpoq, minnerunngitsumik eqimattakkaanit ikitsunit kalaallit ulluinnaannut kulturiannullu qanillerusuttut. Nuummiit qanittuunera, Nuummilu takornariaqarneq assut annertunera ilutigalugu angalasut amerliartorput illoqarfissuup avataanukarlutik allamik misigisassarsiorusuttut. Ukiut tallimat qaangiuppata aappariit neriuutigaat illuaqqatik pingasut tamarmik pitsanngoriartissimassallugit ilaatigut Inussuit Lodge saunalerlugulu kinisimaartarfilernissaanik, Ikkamiut nutarternissanik kiisalu tikeraanut sulisunullu illuaqqat amerlanerusut angusimassallugit. Pingaarnerpaatullu aappariittut suliaqarnerminni nunarsuarmit tamarmit tikeraarfiusartussamik isumalimmik, nuannaarnermik misigisanillu nuannersunik ingerlatsissallutik.
